طفولة ولعب بالنهران

رحيم الغالبي
raheemalghalbi@yahoo.com
الحوار المتمدن - العدد: 2705 - 2009 / 7 / 12


أيسن لاتدكن باب
اخاف الرقم متغيّر
احب هالباب ...
واعرف رقمة -
من انه ابكدهم العب ازغيّر

اجي امبلل الثوب
اسبح بالنهر
وفوك ع الشباج اشرّه
شلون ارد لهلي؟
يعمري ودوم متحيّر....!!
واكول ..ايسن بنات اهلي
التحبنّه طلع بره المدينه
وبره

....
وكايل امسيّر
اكول ايسن
بنات اهلي
الكحل مالوّن اجفونه
الغزل ما غيّر اعيونه
طلع
مكسور خاطر.. من يسألونه
الغلط بيمن يبعد اهلي..
.... ويبعد اهلك...يبعد اهلي ؟؟
اظل بغير عينك جا بعد شلّي ؟؟
اشوف عيون يابو عيون
صدّك ما احبها شما الي تخلّي...!!
يلنها عيون سل بغمزتها تحط...
وسم بشفافها تكلّي
ويبعد اهلك .
يبعد اهلي....!!!
طحت وانده بكل الناس...
ولابالناس تندهلي

...... لكن مو كلها
لاجل الاخرة تصلي...!!!
اكول ايسن بنات اهلي
وأعلن فوك كل الماي....
حايط طين...
شنعلّي
وعشت وحدي
اظل وحدي... منارة خوف
بالغربة :
اريد اجفوف توصلّي
اظل غربة ...وبعد غربة...!!
يبعد اهلي........................
وين الجنة ...؟
متنه وصار كل اسنينّه انصلي
يبعد اهلي ؟



1980 الشطرة

ابو غيث الشاعر المبدع
هي قصيدة الوجع والآهات والغربة والأنتظار هي رغيف خبز من ايد خبزته في تنور الثمانينات حيث وضوح الكلمة واصالتها ولها اذن تسمعها
مع خالص ودي

استاذنا وملهمنا وخيمتنا التي نحتمي بها من العواصف الشرسه
دمتم لخدمة الادب والفن لصالخ الشعب والوطن
لي موضوع اخر في المقالات
كل اعتزازي
رحيم الغالبي

ابداع داثم ليس بالشعر الشعبي فقط ولاكن بشتى المواضيع استاذنا العزيز

شكرا للشاعر همام الهلالي لاطلاعك على القصيدة وكلامك السديد
تحياتي والى صباح الهلالي كل الود والاعتزاز

بل اكثر من قصيده رائعه وهذا ليس بغريب على الغالبي

محبه وكل اعتزاز لك شاعرنا المبدع صباح الهلالي