قصيدة

گطره
سامي عبد المنعم
گطر ابروحي .. اعله هونك
گطره .. گطره
ولا اتوازيني ...
تره روحي خفيفه وتستحي
او مشتهيه مطره
لا اتخلي الشوگ ينزل للعظم
وايبات بين اضلوعي ليل
لااتخلي الفرگه اطول من شبگتك
خاف اثلج ... واشتهيك
انته كل شبگه اتوديني مسافه
واشتعل.. واطفه
وافرفح بين اديك
گلبي چان اهواي يحچيلي عليك
چنت اچذبه .. وما اصدگ اله بيك
ياما بشطوطك خذاني الهوه اشراع
روجه تشمرني على روجه
وما ضگت منك جرف
غرگتني ابمايك الصافي ..
ونمت بعيوني خوف او مستحه
وانحدرنه ويه الهوى.. الماي العروس
ابغفله لن الليل اخذنه .. وما درينه
ورجف گلبي ...
ردني .. يمعود الذاك الصوب وغسلني
اخاف امي اتشم ريحتك بيه
ويجفل ابروحي الدفو
شبگه منك وصلتني الباب عتبتنه
وطحت شدة ورد
امي حضنتني ابفرح .. عصرت ثيابي
ريحتك فاحت بديها..او ورطتني
وياما ياما وهدنتني
وهدنوك او وهدنتني
وهدنتني ابناس ..عدها الشرف يشبه ثوب حيه
اتنزعه يا ساعه التريد
تذكر باول عشگنه.. ؟
اشگتلي عن ذوله الخذوك ابليله ظلمه
ورادوا اتبيع العشگ والمستحه
گتلي ذوله انذال ما بيهم شريف اينغزه جرحه
او مرت اسنين ونسيت
او وهدنوك ..
وگتلك اصحه
اصحه... بس اصحه
اتشوف الناس بدروبك عشگ

بغداد / 1979

اخي الأستاذسامي عبد المنعم المحترم
انها نفث من روح كلماتها مرسومة بدقة وهي منحدرة من شذى السبعينات
شكرا لمساهمتك البديعة وننتظر المزيد
مع خالص تحياتي وودي
حسين الهلالي