بعدني

بعدني

سامي عبد المنعم
اشكثر خله الزمان ابگلبي لچمات
او مشه ابروحي الحزن واللايمه اتلوم
الگلب چالی وخلص یاناس هدمات
وصفت روحي خرابه امعاشره البوم
الوكت قاسي ويدور وياي زلات
وابعز الظهر راواني النجوم
افز من صفنتي وتاخذني صفنات
نحل جسمي وعجز عن شيل الهدوم
گمت اكره حياتي واحسد المات
شله ابطولة حياته الگلبه مالوم
احن البيتنه واذكر زماني الفات
حنين الفارگ اهله وشوگ مفطوم
عفاني اشگد شفت بايامي صدمات
ثوب الحزن ضل وياي للدوم
اتعجب لبعض الناس مرات
ترهم ويه ياهو الچان واتروم
عگب ربعي وحضن بغداد سهرات
صرت من خبزة التنور محروم
گبل لما اتهب من دجله نسمات
ايفز ابروحي رف اطيور وايحوم
هسه الليل يگضي ابطرگ دمعات
او هوى الغربه ايمر ابريتي اسموم
ايضل ليل السهر وي وحشتي ايبات
ابسگم وجفون عيني امحاربه النوم
تمنيتك تجي وتطوي المسافات
اتطيب خاطري واتزيل الهموم
بعدني امسايسك رغم العذابات
سرك بالگلب لليوم مكتوم
طبع درويش بيه وخلگ نحات
ابهداوة بال اصبر على المقسوم
ايمر اسمك غفل باحساسي نغمات
مثل صوت الاذان اليكسر الصوم

اخي سامي
هو نفث صادق من روح ملجومة بسجاجين الزمن وآهات حرى ودفق من قلب يقطردماعصرته الغربةفما عساك ان تفعل وانت مقيد
بقيود الغربة اعانك الله ،انها قصيدة نصارية رائعة
مع خالص تقديري
حسين الهلالي