قالت الشاعرة (ن) في زمن مضى

قالت الشاعرة(نون ) في زمن مضى
من اجه جفي على جفك
ــــــــــــــــــــــــــــــــــ
من اجه جفي على جفك
حسبت هذا تنازل
مادريت القلب يخفق الك وحدك
من اجه جفي على جفك
حسبتني اتنازلت وقبلت شرطك
لايروح الروح غلطان بحسبتك
وتظن توقيع العهد مني المحبتك
مااريدك مااريد امواصلك ماريد ودك
وشطب اليوم الأجيتك بيه اوشفتك
خلي روحي بنار هجرك تصطلي ماريد جنتك
لجن ياذيني القلب ويريد ودك
وآنه اجابر
وآنه خاف من الدمع يفضح اسراري
وانظرلذاك خيالك ولعد خطواتك اباري
بس اجابر من اكولن آنه عفتك

الرد لحسين الهلالي
ـــــــــــــــــــــــــــــــــ
ريّض يلخذيت الروح ليش انت الوصل كطعيت
وتدري من الزغر يازين آنه على المهد لوليت
احوم عليك مثل الطير اخاف عليك لوفزيت
اسليلك شحم قلبي وكطرلك وهج روح اذاعطشيت
وانت تدري بحجي الشمات كيت وكيت
اشلون اتحدك الجمات عني يوم من بعديت؟
اشلون تبيح سر للغير سم ابمهجتي فتيت؟
اشلون اتحدك العذال عني يوم ونكطعيت؟
اهم حدوك تجفي اهواك يو طال المدى ومليت
ولك تعب التعبته اوياك تاليها بغدر جازيت
اهي دنيا وفلكهه يدور وآنه من الصبر عبيت
ويجي يوم الأشوفك بيه بتعس حال الي رديت
مالي اعتاب الي وياك يلماشي بزعل جافيت
ذاك آنه ولابيه الذي حل بيك وهتزيت
اظل لهل الهوى راية واظلن صيت
ولاجزعت تر روحي وشدن وطوي اجروحي ولاجليت
متت انت وانا حي الهوانه الما اله نكريت
ولو طال المدى او بحسابك تر شطيت
ولانادم على العشرة ولادمعه تر سحيت
نشرت اعلان بالساحات واضح على الترك انويت
اظل آنه عبير اهل الهوى يفرحون لو هبيت